Astarot - O romance da lavandeira

Era unha noite de lúa,

era unha noite clara,

eu pasaba polo río,

de volta da muiñada.

Topei unha lavandeira

que lavaba ó par da agua

ela lavaba no río,

e unha cántiga cantaba.

Moza que ves do muíño,

moza que vas pola estrada:

axúdame a retorcer

miña sábana lavada.

Santa María te axude,

e San Lourenzo te vaia

Desparece a lavandeira

como fumeira espallada.

Onde as sábanas tendera

poza de sangue deixara.

Era unha noite de lúa,

era unha noite clara

Era unha noite de lúa,

era unha noite clara...